Einu lélegasta leikári í sögu Leikfélags Akureyrar lokið

Einu lélegasta leikári í sögu Leikfélags Akureyrar (LA) í langan tíma lauk með enn einum tveggja manna farsanum, hrærivélarvitleysunni. Mér varð hugsað til ummæla, sem höfð voru eftir leikhússtjóranum Maríu Sigurðardóttur í Fréttablaðinu í vetur, sem voru á þá leið að svo mikil leikhúsmenning væri á Akureyri. Leikhúsmenningin, sem farið hefur fram á fjölum Samkomuhúss Akureyrar í vetur uppistendur af t.d. Sveppa, Harry og Heimi, Farsælum farsa, sem líkt var við freyðandi undanrennu af Sigurbjörgu Árnadóttur í Fréttablaðinu og tek ég undir það, Villidýr og pólitík og endaði á hrærivélarvitleysunni eins og fyrr er getið. Auðvitað enginn akureyrskur leikari því þeir fá ekki aðgang að leikhúsinu.

Er enginn metnaður orðinn til hjá LA? Allt er aðkeypt og leikarar allir að sunnan og hlýtur að vera kostnaðarsamt uppihald, flugferðir og laun. Á síðasta ári nægðu ekki 120 milljónir, sem LA fékk frá ríki og bæ og óskiljanlegt að Akureyrarbær láti sig hafa það að henda tugum milljóna í slíkan rekstur þar sem uppistaðan er tveggja manna lélegir farsar með aðkomuleikurum. Engar alvöru leiksýningar. Spennandi leikár fram undan er gjarnan haft eftir leikhússtjóra.

Ég, sem félagi í Leikfélagi Akureyrar, sé ekkert spennandi við reksturinn og er ekki einn um það og leyfi mér að fullyrða að rekstur LA er á hraðri niðurleið. Það er kannski lýsandi dæmi fyrir ástandið að þarna er fámenn klíka, sem virðist hafa yfirtekið félagið og dæmi eru um að þeir sem hafa orðið að ganga úr aðalstjórn vegna reglna félagsins láta kjósa sig í varastjórn til þess eins að komast aftur í aðalstjórnina. Að lokum vil ég svo nefna annað dæmi, sem ég þekki ekki frá öðrum félögum og veit ekki hvort er löglegt, að á síðasta aðalfundi var reikningum félagsins ekki dreift uppsettum og prentuðum á meðal félagsmanna heldur var þeim varpað eins og skuggamyndum upp á tjald og illmögulegt að fylgjast með. Ég lagði fram tillögu til stjórnar LA á síðasta aðalfundi um að félagið yrði aftur gert að áhugamanna- eða hálfatvinnumannaleikhúsi og á þar við að byrjað verði aftur á byrjunarreit með akureyrskum leikurum því nóg er til af þeim og virðing Leikfélags Akureyrar verði reist við á ný.

Freyvangsleikhúsið réðst ekki á garðinn þar sem hann er lægstur þegar það tók tók til sýninga Góða dátann Svejk, sem er stórgóð sýning með hátt í þrjátíu leikurum. Stórgóð leiksýning með mörgum ágætum leikurum og var hún valin athyglisverðasta áhugaleiksýning leikársins 2010-2011. þetta er í annað skiptið á síðustu þremur árum, sem Freyvangsleikhúsinu hlotnast þessi heiður, en í fyrra skiptið var það Vínlandið eftir Helga Þórsson, stórgóð sýning og báðar hlutu þann sess að vera sýndar í Þjóðleikhúsinu. Leikararnir eru bæði úr Eyjafjarðarsveit og frá Akureyri, áhugafólk, sem vinnur kauplaust af áhuga og ánægju og á svo sannarlega heiður skilinn. Fleiri mættu taka þetta fólk sér til fyrirmyndar og sumt ekur tugi kílómetra á æfingar. En af öllu þessu ágæta fólki, sem tekur þátt í Svejknum, ólöstuðu var eftirtektarverður Ingólfur Þórsson í hlutverki lautinants Lúkasar og gerði því sterk og góð skil en síðast en ekki síst Brynjar Gauti Schiöth, sem leikur sjálfan Svejk og fer hreinlega á kostum og gefur ekkert eftir atvinnuleikurum nema síður sé. Þetta var toppleikur hjá þér Brynjar. Hafið öll miklar þakkir fyrir góða sýningu.

Leikfélag Hörgdæla er annað áhugamannafélag, sem tefldi djarft til leiks að þessu sinni og tók til sýningar leikverkið Með fullri reisn. Þrjátíu urðu sýningarnar og varð að hætta fyrir fullu húsi í vor vegna sauðburðar sem var byrjaður hjá bændum, en margir þeirra eru leikarar, en til stendur samt að setja upp fleiri sýningar í haust því sagt er að saumaklúbbar hafi verið sérlega áhugasamir að sjá bændurna stríplast í allra handa stellingum þó svo engin hafi verið trúboðastellingin. Annars var þetta mjög fjörug og athyglisverð sýning með um 20 leikurum og haft hefur verið á orði að leikhúsgestir hafi farið hlæjandi heim úr Hörgárdalnum eftir sýningar. Mikil auglýsingaherferð var í gangi hjá Hörgdælingum, sem sýndi bændurna, leikarana, nakta í ýmsum stellingum eins og fyrr segir og skilaði sér vel.

Það er mikið á sig lagt hjá þessum landsbyggðarleikfélögum, en enginn telur eftir sér að eyða tíma í þetta svo vikum skiptir enda fá þau umbun erfiðis síns. Það var mikið þess virði að eyða kvöldstund í Hörgárdalnum því þarna er á ferðinni margur gullmolinn í hlutverkum og af mörgum góðum voru að mínum dómi eftirtektarverðust Stefanía Elísabet Hallbjörnsdóttir í hlutverki Jóhönnu og gerði því góð skil svo og stórleikarinn Bernharð bóndi Arnarson, sem Gunni og stendur Benni sig alltaf vel.

Þakkir fyrir góða skemmtum.