Dómurinn ógnar ekki fjármálastöðugleika

Niðurstaða Héraðsdóms Reykjavikur um fjármögnunarleigusamningana hefur ekki neikvæð áhrif á fjármálastöðugleika, segir Árni Páll Árnason, efnahags- og viðskiptaráðherra, í samtali við Vísi.

„Þetta er innan þess ramma sem Fjármálaeftirlitð gerði ráð fyrir að gæti fallið í fyrrahaust. Þá hafði Fjármálaeftirlitið gefið út greiningu þar sem flokkuð voru þau lán þar sem væru umtalsverðar líkur á því að gætu fallið,“ segir Árni Páll. Þar hafi verið um að ræða 50 milljarða högg fyrir fjármálafyrirtækin í tilviki heimilanna og 58 milljarðar í tilviki fyrirtækjanna. Þar sé um að ræða ýmiskonar lán og fjármögnunarleigusamningarnir á meðal þeirra. „Þetta eru lán sem eru í þeim hópi,“ segir Árni Páll.

Samtök iðnaðarins segja að dómurinn í gær um fjármögnunarleigusamningana snúist um milljarðahagsmuni. Þá séu hundruð, ef ekki þúsundir, starfa í húfi. Árni Páll segir dóminn mikilvægan fyrir atvinnulífið. „Þetta er auðvitað mjög mikilvægt fyrir þá sem voru með svona samninga, ef þetta gengur eftir í Hæstarétti,“ segir Árni Páll, en bætir við að erfitt sé að spá fyrir um hvernig Hæstiréttur muni dæma.

Árni Páll bætir við að það séu margskonar úrræði í gangi fyrir lítil og meðalstór fyrirtæki í skuldaúrvinnslu. „Það er auðvitað ekki bundið við þessa samninga, heldur einfaldlega að fyrirtækin séu rekstrarhæf og eigi sér rekstrarforsendur,“ segir Árni Páll. Þar bendir Árni Páll einkum á „Beinu brautina“ þar sem bankarnir hafi skuldbundið sig til þess að gera fyrirtækjum sem uppfylla skilyrði hennar tilboð um endurskipulagningu skulda fyrir sumarið. „Það er mjög mikilvægur kostur,“ segir Árni Páll að lokum.