Viljayfirlýsing um sölu á Perlunni undirrituð

Orkuveita Reykjavíkur hefur skrifað undir viljayfirlýsingu um sölu á Perlunni við þá aðila sem áttu hæsta tilboð í eignina. Í tilkynningu frá fyrirtækinu segir að bjóðendur fái nú frest til 31. mars næstkomandi til að aflétta fyrirvörum í tilboði sínu.

„Fyrirvararnir miðast við að treysta forsendur hagkvæmniathugunar, sem liggur til grundvallar tilboðinu. Hæstbjóðendur eru innlendir fjárfestar sem starfað hafa á sviði ferðaþjónustu og húsbygginga. Garðar Vilhjálmsson lögmaður er í forsvari fyrir þeim,“ segir ennfremur.

Þá segir að sex tilboð hafi borist í Perluna, en eignin var auglýst til sölu nú á haustdögum. „Öll voru tilboðin háð einhverjum fyrirvörum en hið hæsta nemur 1.688,8 milljónum króna. Ekki verður ráðist í viðræður við aðra bjóðendur meðan viljayfirlýsingin við hæstbjóðendur er í gildi.“

Tankarnir ekki seldir

Hitaveitutankarnir sem Perlan er byggð ofan verða ekki seldir og munu áfram þjóna hitaveitunni í Reykjavík.

„Perlan var auglýst til sölu í byrjun september og rann tilboðsfrestur út 18. október. Hún er ein þeirra eigna sem stjórn OR samþykkti að selja í janúar síðastliðnum. Þá voru einnig settar reglur um söluferli eigna og ákveðið að gefa eigendum fyrirtækisins kost á að kaupa tilteknar eignir áður en þær færu í almenna sölu. Borgarráð Reykjavíkur ákvað samhljóða á fundi 23. júní sl. að gera ekki athugasemdir við að Perlan færi í almenna sölu. Í framhaldinu leitaði OR tilboða í umsjón með sölu stærri eigna og sér Fasteignasalan Miklaborg um söluna.“

Hluti Orkuveituhússins auglýst um helgina

„Sala Perlunnar er hluti aðgerðaáætlunar Orkuveitu Reykjavíkur og eigenda fyrirtækisins sem samþykkt var í vor. Samkvæmt henni mun fyrirtækið afla fjár með sölu á eignum utan kjarnastarfsemi að fjárhæð 10 milljarða króna á árabilinu 2011 til og með 2016. Eignasalan, eins og aðrar aðgerðir, eru á áætlun,“ segir að lokum um leið og minnst er á að nú um helgina hafi hluti höfuðstöðva Orkuveitu Reykjavíkur að Bæjarhálsi 1 verið auglýstur til leigu eða sölu. Þar er um að ræða austurbygginguna.