Irving Oil skoðar aftur olíurekstur hér

Forsvarsmenn kanadíska olíufyrirtækisins Irving Oil eru staddir hér á landi. Eftir því sem næst verður komist er tilgangur heimsóknarinnar að funda með stjórnendum íslenskra olíufélaga og kynnast rekstri þeirra. Ekki er talið útilokað að þeir kaupi N1 eða Skeljung en bæði fyrirtækin eru í skyldum rekstri og Irving Oil í Kanada.

Fjárhagsleg endurskipulagning N1 hefur staðið yfir um nokkurt skeið og er stefnt að því að ljúka henni í sumar. Fyrir rúmum mánuði var tilkynnt um drög að samkomulagi á milli eigenda fyrirtækisins og kröfuhafa sem felur í sér að helstu lánardrottnar og eigendur skuldabréfa félagsins, Arion banki, Íslandsbanki og lífeyrissjóðir, taki olíuverslunina yfir.

Skeljungur hefur upp á síðkastið selt frá eignir, þar á meðal höfuðstöðvarnar í Reykjavík og ýmis verkstæði.

Hermann Guðmundsson, forstjóri N1, kannaðist ekki við fyrirhuguð fundarhöld með forsvarsmönnum Irving Oil þegar hann var inntur eftir þeim í gær. Ekki náðist í Einar Örn Ólafsson, forstjóra Skeljungs.

Irving Oil hefur í rúm sautján ára skeið haft hug á að hefja hér rekstur olíuverslunar, reisa hér birgðastöð og selja eigin olíu. Fyrirtækið hafði tryggt sér lóðir á nokkrum stöðum í Reykjavík, svo sem í Sundahöfn árið 1995. Stjórnendur olíufélaganna þriggja, Esso (nú N1), Olís og Skeljungur brugðust hart við og mótmæltu áformunum. Niðurstaðan varð sú að forsvarsmenn Irving Oil drógu í land. Forsvarsmenn Irving Oil hafa nokkrum sinnum borið víurnar í rekstur hér síðan þá og síðan í byrjun árs 2000 hefur félagið Irving smurolíur á Íslandi verið með starfsemi hér á landi í tengslum við innflutning á smurolíum undir eigin nafni.

Irving Oil var stofnað í Nýju-Brunswick í Kanada árið 1924 og hefur félagið frá upphafi verið í eigu hinnar vellauðugu Irving-fjölskyldu. Fyrirtækið á í dag ráðandi hlut í um þrjú hundruð fyrirtækjum í olíuiðnaði, olíuhreinsun, smásöluverslun, iðnaði og fjölmiðlum. Þá rekur félagið um tvö þúsund bensínstöðvar á austurströnd Kanada.

jonab@frettabladid.is