Orkuveitan: Hefðu ekki getað borgað laun án björgunarpakkans

Orkuveitan er gjaldþrota fyrirtæki að mati Bjarna Bjarnasonar forstjóra Orkuveitunnar og hefði ekki getað borgað starfsfólki laun án björgunarpakkans sem samþykktur var í dag. Stofnuð hefur verið sérstök rannsóknarnefnd sem fara mun yfir málefni Orkuveitunnar.

Borgarráð samþykkti í morgun 12 milljarða króna lán eigenda Orkuveitunnar til fyrirtækisins. Og Orkuveitan kynnti á blaðamannafundi róttækar niðurskurðaraðgerðir sem miða að því að rétta reksturinn við.

Fjárfestingum verður frestað og eiga að sparast með því 16 milljarðar króna. Rekstrarkostnaður verður lækkaður um 5 milljarða. Tíu milljarðar eiga að koma inn með sölu eigna, átta milljarðar með öðrum sparnaði og svo 12 milljarða lán frá eigendum Orkuveitunnar.

„Orkuveitan er búin að vera á langri siglingu en er mjög illa stödd núna. En skipið er ekki sokkið," sagði Bjarni Bjarnason, forstjóri Orkuveitunnar.

Bjarni kynnti á fundinum nýja tíma og hugsun í rekstri Orkuveitunnar. Sá tími væri kominn að fyrirtækið breytti starfsháttum sínum og einbeitti sér að grunnveituþjónustu við borgarbúa. Hann sagði Orkusölu til stóriðju ekki koma lengur til greina.

Og að allar eignir fyrirtækisins sem ekki tengdust kjarnastarfsemi væru til sölu, þar á meðal Perlan og höfuðstöðvar Orkuveitunnar, en ekki ríkir full sátt meðal eigenda Orkuveitunnar um sölu Gagnaveitunnar þó Bjarni telji þá þjónustu ekki falla undir kjarnastarfsemi.

Þá tilkynnti Bjarni um miklar gjaldskrárhækkanir. Heita vatnið mun hækka um átta prósent og fráveitan um 45%. Þá verður starfsfólki fækkað um 90 með ráðningarbanni til ársins 2016.

Á þessu grafi sést vel sá alvarlegi vandi sem Orkuveitan glímir við. Frá árinu 2000 hækkuðu skuldirnar jafnt og þétt. Skuldirnar nema nú yfir 200 milljörðum og er bróðurparturinn í erlendri mynd. Þær skuldir á nú að lækka.

„Mér finnst mjög sorglegt að staðan sé svona. En loksins liggur niðurstaða á borðinu," sagði Jón Gnarr, borgarstjóri Reykjavíkur um alvarlega stöðu Orkuveituna.

Á blaðamannafundinum í dag kom einnig fram að samþykkt hafi verið í borgarráði að setja á laggirnar einskonar rannsóknarnefnd vegna málefna Orkuveitunnar.

„Samfylkingin hefur verið í borgarstjórn og meirihluta. En líka minnihluta. Við eigum ekki að setjast í dómarasætið sjálf. Ég kvíði ekki niðurstöðunni í því máli," sagði Dagur B. Eggertsson, oddviti borgarstjórnarflokks Samfylkingarinnar.