Knudsen líklega með á HM

Það bendir flest til þess að línumaðurinn sterki, Michael Knudsen, spili með Dönum á HM eftir allt saman en hann var nánast afskrifaður fyrir jól.

Hann náði aftur á móti að spila með Flensburg fyrir áramót og hnéð á honum er betra en hann sjálfur þorði að vona.

"Ég held ég geti hjálpað á HM. Ég er betri en ég átti von á og þar af leiðandi bjartsýnn," sagði Knudsen.

Ulrik Wilbek, þjálfari Dana, mun gefa Knudsen lengri tíma áður en hann tekur endanlega ákvörðun um hvort hann taki línumanninn með til Svíþjóðar.