Hafþór Ingi gengur til liðs við Snæfell

Körfuknattleikskappinn Hafþór Ingi Gunnarsson hefur gengið til liðs við Snæfell. Hafþór skrifaði undir eins árs samning en hann kemur til félagsins frá Skallagrími sem leikur í 1. deild.

Hafþór Ingi þekkir vel til í Stykkishólmi en hann spilaði með Snæfelli leiktímabilið 2003-2004.

Í viðtali á karfan.is kemur fram að Hafþór Ingi hafi stefnt á nám í Háskóla Íslands. Hann hafi hins vegar ekki fengið inngöngu í skólann og því ákveðið að breyta til. Fleiri lið hafi verið á höttunum eftir honum en Snæfell orðið fyrir valinu.

Þá hafa Daníel Ali Kazmi, Sveinn Arnar og Þorbergur Sæþórsson gengið frá leikmannasamningum við Snæfell.