Endurreisn fjármálakerfisins vel á veg komin

Sendinefnd Alþjóðagjaldeyrissjóðsins stefnir að því að fimmta endurskoðun efnahagsáætlunar Íslands verði í apríl. Nefndin hefur verið á Íslandi í vikunni til að undirbúa endurskoðunina. Þetta kom fram á blaðamannafundi með Julie Kozack yfirmanni sendinefndarinnar í dag.

Kozack segir það ljóst að íslenska hagkerfið sé að taka við sér. Útlit sé fyrir hagvöxt í fyrsta sinn frá hruni en helsta verkefni stjórnvalda sé að draga úr atvinnuleysi. Þá segir Kozack ennfremur að endurreisn fjármálakerfisins sé vel á veg komin og að Alþjóðagjaldeyrissjóðurinn sé sammála íslenskum stjórnvöldum um að stefna beri að afnámi gjaldeyrishaftana.