Orkuveitan getur ekki útvegað rafmagn

Viðræðum um kísilverksmiðju í Þorlákshöfn hefur verið hætt þar sem Orkuveita Reykjavíkur getur ekki útvegað rafmagn. Félaginu Thorsil hefur í staðinn verið boðið að keppa við önnur fyrirtæki um orkuna í Þingeyjarsýslum.

Það var fyrir nítján mánuðum, í febrúar á síðasta ári, sem fulltrúar félagsins Thorsil mættu í höfuðstöðvar Orkuveitu Reykjavíkur til að undirrita samningsramma um verkefnið við þáverandi forystumenn Orkuveitunnar og fulltrúa sveitarfélagsins Ölfuss.

Kanadíska félagið Timminco ætlaði að vera aðalfjárfestir en það hafði í samvinnu við íslenska félagið Strokk Energy stofnað Thorsil um verkefnið. Mikil bjartsýni ríkti og bæjarstjóri Ölfuss sá fram á 400 ársverk á byggingartíma og 160 framtíðarstörf í Þorlákshöfn en smíði kísilverksmiðjunnar átti að hefjast í sumar og framleiðslan eftir tvö ár.

Skemmst er frá því að segja að öll eru þessi áform nú gufuð upp og ljóst að engin kísilverksmiðja rís á næstunni í Þorlákshöfn á vegum Thorsil. Bjarni Bjarnason, forstjóri Orkuveitunnar, segir að samningur aðilanna sé runnin út og því ekki lengur í gildi.

Orkuveitan muni auk þess enga nýja samninga gera fyrr en niðurstaða fæst í deilu milli hennar og Norðuráls um raforkusölu til Helguvíkur. Lengi hefur raunar legið fyrir að Orkuveitan væri af fjárhagsástæðum ekki til stórræðanna í orkuframkvæmdum en það var þó fyrst fyrir um það bil mánuði sem Thorsil fékk það endanlega staðfest á fundi með Orkuveitunni að þaðan fengi það enga orku í kísilver á næstunni, að sögn Hákons Björnssonar, talsmanns Thorsil.

Félagið hafði raunar þegar í vor snúið sér til Landsvirkjunar með ósk um kaup á 85 megavöttum. Þar sem Landsvirkjunarmenn höfðu engin áform um virkjanir sunnanlands var Thorsil-mönnum, eins og öllum hinum, vísað á Bakkalóðina við Húsavík og boðið að gera tilboð í raforkuna í Þingeyjarsýslum.