Button telur McLaren hafa slagkraftinn til að sigra í Kanada

Lewis Hamilton hjá McLaren keppir í Formúlu 1 mótinu i Montreal í Kanada um næstu helgi, en Hamilton vann mótið í fyrra, en liðsfélagi hans Jenson Button varð annar. Hamilton vann sinn fyrsta sigur í Formúlu 1 í Montreal og mótssvæðið er honum því kært.

„Montreal er mjög sérstakur staður í mínum huga. Ég náði besta tíma í tímatökum í fyrsta skipti þarna og vann minn fyrsta sigur. Mér hefur alltaf líkað við brautina og lega hennar virðist henta akstursstíl mínum. Ég vann í fyrra, eftir að hafa náð besta tíma í tímatökum", sagði Hamilton í fréttatilkynningu frá McLaren.

„Það sem er líka mikilsvert er að áhorfendur í Montreal og allir í Ameríku sem ferðast til að fylgjast með mótinu eru meðal bestu áhorfenda í heimi. Þeir eru svo jákvæðir og vingjarnlegir og veita stuðning. Heimsóknir mínar til borgarinnar hafa verið með bestu upplifunum mínum og ég hlakka til að mæta til Montreal og finna fyrir vingjarnlegu viðmóti."

„Bíll okkar ætti að henta þessari braut. Við erum með frábæra vél og besta KERS-kerfið og gott grip út úr beygjunum. Í heildina litið þá ætti þetta að vera góð helgi og við munum stefna á góðan árangur", sagði Hamilton.

Button leiddi síðustu keppni um tíma, en hún var í Mónakó og lauk Button keppni í þriðja sæti, á eftir Sebastian Vettel á Red Bull og Fernando Alonso á Ferrari.

„Það er slagkraftur innan liðsins í augnablikinu. Ég tel að við höfum haft bíl til að geta unnið mót, bæði á Spáni og í Mónakó. Með því að bæta árangurinn í tímatökum, þá förum við að geta ráðið ferðinni. Við sýndum það lítillega í síðustu tveimur mótum", sagði Button.

„Ég er enn mjög ánægður með frammistöðu mína í Mónakó. Ég sigraði ekki, en það var gaman að vera í forystu og auka bilið, jafnvel þó að lokastaðan hafi ekki orðið sú sama. Það er gott að hafa þetta í huga", sagði Button.

„Mér gekk vel í Montreal í fyrra. Bíllinn var frábær í keppninni. Ég gat beitt bílnum skemmtilega nokkrum sinnum og okkur tókst okkur að tryggja liðinu fyrsta og annað sætið. Ég hef aldrei unnið í vestan hafs og ég tel að við höfum hraðann, slagkraftinn til að breyta því. Ég hlakka til", sagði Button