Allt sem börn þurfa að vita læra þau í leikskóla

Flest það sem börn þurfa virkilega að vita um lífið og tilveruna, hvernig þau eiga að hegða sér, hvað þau eiga að gera, læra þau í leikskóla. Þau læra um lýðræðisleg gildi og kærleikann, að taka tillit til annarra, bera umhyggju fyrir öðrum, meiða ekki annað fólk, lifa í jafnvægi og leggja sig eftir góðan hádegismat. Börn læra að leika sér saman á sanngjarnan hátt, deila með sér og biðja fyrirgefningar þegar þau særa aðra. Börn læra að skila hlutum á sinn stað, laga til eftir sig og taka ekki það sem aðrir eiga. Börn læra að tala, teikna, mála, syngja og hreyfa/dansa í gegnum leik og vinnu á skapandi hátt á hverjum degi. Börn læra að þegar þau fara út í heiminn þurfa þau að muna eftir því að gæta sín á bílunum, leiða og halda hópinn. Síðast en ekki síst að taka eftir öllum frábæru undrunarefnunum í kringum sig.

Hugsið ykkur hve miklu betri heimurinn væri ef við myndum öll hafa þá reglu í öllum þjóðfélögum að bera umhyggju hvert fyrir öðru og hafa lýðræðisleg vinnubrögð að leiðarljósi. Skila öllu á sinn stað og laga til eftir okkur. Borða hollan og góðan mat og leggja okkur svo með hlý teppi um stund. Satt að segja er alveg sama á hvaða aldri við erum, ef við förum út í heiminn er best að haldast í hendur og standa saman.

Í spjallinu hér að framan er stuðst við Robert Fulghum sem staðhæfir að það frábæra veganesti sem hann fékk út í lífið, hafi hann fengið í leikskóla. Til þess að slík skilyrði skapist og nái að blómstra og dafna verður að beina kastljósinu að leikskólakennurum, lykilfólkinu í leikskólastarfinu. Leikskólakennurum er vel ljós sú ábyrgð sem þeir hafa lagt á sínar herðar með vali á starfsvettvangi. Þeir eru boðnir og búnir til að styðja og leiða börnin á þroskabraut sinni, þeir gefa mikið af sér og sýna börnum mikla alúð og virðingu. Leikskólakennarar gera sér grein fyrir að kennsla ungra barna getur verið krefjandi og flókin, en jafnframt gefandi, fjölbreytt og skemmtileg.

Þegar þetta er skrifað blasir við verkfall leikskólakennara, ef ekki verður búið að semja við þá fyrir boðað verkfall 22. ágúst. Styðjum leikskólakennara og stöndum öll saman með þeim í sanngjarnri kjarabaráttu.