Umfjöllun: HK á leið í úrslitakeppnina eftir stórsigur á Fram

HK-ingar tryggðu sér sæti í úrslitakeppninni eftir frábæran sigur á Fram, 35-26, í næstsíðustu umferð N1-deildar karla í kvöld. Jafnræði var með liðunum í byrjun leiks, en gestirnir gjörsamlega keyrðu yfir lánlausa Framara í síðari hálfleik. Munurinn var mestur 11 mörk á liðunum og sigur HK aldrei í hættu.

Það var að duga eða drepast fyrir HK í kvöld er þeir mættu í Safamýrina. Gestirnir í HK voru fyrir leikinn í fjórða sæti N1-deildar karla með 20 stig líkt og Haukar, en þau lið berjast óðum um síðasta sætið í úrslitakeppninni ásamt Valsmönnum sem eiga veika von. Framarar hafa verið á mikilli siglingu í undanförnum tveimur leikjum og allt annað að sjá til liðsins. Fram getur gulltryggt sig inn í úrslitakeppnina með sigri og því mátti búast við hörku handbolta í Framheimilinu í kvöld.

Jafnræði var með liðunum í byrjun leiks og skiptust þau á að hafa eins mark forskot. Staðan var 7-7 eftir tíu mínútna leik. Framarar keyrðu virkilega hratt í bakið á HK í hverri sókn en þeim lauk oftast með skoti um leið eða í annarri bylgju. Björn Ingi Friðþjófsson, markvörður HK, stóð sig vel í byrjun leiks og hafði varið 7 skot eftir 15 mínútna leik.

Gestirnir í HK hrukku þá í gang og skoruðu fimm mörk í röð og allt í einu var staðan orðin 15-10 fyrir HK. Framarar köstuðu boltanum í gríð og erg frá sér og HK-ingar náðu að nýta sér mistökin. Frábær varnarleikur og markvarsla var ástæðan fyrir forystu HK-inga, en Framarar náðu aðeins að rétta úr kútnum fyrir hálfleik en staðan var 17-14 fyrir gestina þegar menn gengu til búningsherbergja.

HK-ingar hófu síðari hálfleikinn af miklum krafti og það var greinilegt alveg frá fyrstu mínútu að þeir voru mun ákveðnari en heimamenn. Þegar síðari hálfleikur var hálfnaður var staðan 24-19 fyrir HK. Á þessum tímapunkti gjörsamlega keyrðu HK-ingar yfir Framara og náðu fljótlega 11 marka forskoti, 23-34.

Leikur Fram gjörsamlega dó í síðari hálfleik og það gekk gjörsamlega ekkert upp hjá þeim. Björn Ingi Friðþjófsson, markmaður HK, lokaði markinu og inn vildi boltinn ekki hjá Fram. Niðurstaðan var því sannfærandi útisigur hjá HK sem í leiðinni tryggði sæti sitt í undanúrslitum Íslandsmótsins.

Björn Ingi Friðþjófsson, markvörður HK, var stórkostlegur en hann varði 21 skot. Ólafur Bjarki Ragnarsson var einnig frábær fyrir HK en hann skoraði 9 mörk. Magnús Stefánsson, leikmaður Fram, sýndi ágætis tilþrif á köflum en hann gerði 7 mörk fyrir Fram.

HK getur með sigri í síðustu umferð haft sætaskipti við Fram og komist í þriðja sæti deildarinnar, en þá verður Fram aftur á móti að tapa fyrir deildarmeisturunum á Akureyri.



Fram - HK 26-35 (14-17)Mörk Fram (skot): Magnús Stefánsson 7 (15), Jóhann Karl Reynisson 6 (6) , Einar Rafn Eiðsson 6/2 (10/3) , Jóhann Gunnar Einarsson 3 (5), Andri Berg Haraldsson 2 (4), Halldór Jóhann Sigfússon 1 (3), Róbert Aron Hostert 0 (3), Stefán Baldvin Stefánsson 0 (2), Matthías Daðason 0 (2).

Varin skot: Magnús Gunnar Erlendsson 6 (21/2, 22%), Björn Viðar Björnsson 7/2 (12/2, 37%)

Hraðaupphlaup: 3 ( Einar Rafn, Jóhann Karl, Andri Berg)

Fiskuð víti: 3(Einar Rafn, Jóhann Karl, Andri Berg)

Utan vallar: 2 mínútur.

Mörk HK (skot): Ólafur Bjarki Ragnarsson 9/2 (14/4), Bjarki Már Elísson 9/2 (13/2), Atli Ævar Ingólfsson 7 (7), Atli Karl Backmann 4 (5), Sigurjón Björnsson 2 (2), Vilhelm Gauti Bergsveinsson 2 (3), Bjarki Már Gunnarsson 1 (2), Hörður Másson 1 (2), Daníel Berg Grétarsson 0 (5).

Varin skot: Björn Ingi Friðþjófsson 21 (25/1, 45%), Valgeir Tómasson 0 (1)

Hraðaupphlaupsmörk: 9 (Bjarki Már Elísson 5, Atli Ævar 3, Sigurjón Björnsson)

Fiskuð víti: 5 (Atli Karl 2, Daníel, Ólafur Bjarki og Atli Ævar)

Utan vallar: 6 mínútur (Bjarki Már)