Helmingur hagnaðar Íslandsbanka vegna afsláttar á lánasafni

Þrjátíu milljarða króna hagnaður Íslandsbanka á síðasta ári, sem er meiri hagnaður en 2007, má að mestu skýra af endurmati á lánum sem bankinn fékk með miklum afslætti frá þrotabúi Glitnis.

Íslandsbanki birti afkomu sína fyrir síðasta ár fyrir helgi en bankinn hagnaðst um 29,4 milljarða króna eftir skatta. Þetta er meira en hagnaður Glitnis á góðærisárinu 2007 þegar bankinn skilaði 27,7 milljarða króna hagnaði eftir skatta. Þess má svo til gamans geta að hagnaður Íslandsbanka í fyrra er næstum því jafn há fjárhæð og samninganefnd Íslands í Icesave telur að lendi á íslenska ríkinu vegna reikninganna en það eru 32 milljarðar króna.

Þegar rýnt er í ársreikninginn sést að hagnaðinn má að mestu skýra af vaxtamun og breytingum á verðmati á lánasafni bankans. Í skýringum með ársreikningnum segir að stór hluti lánanna hafi verið keyptur með miklum afslætti en þar er vísað til verðmats á eignum sem færðar voru til Íslandsbanka frá Glitni eftir hrunið þegar stofnaður var nýr banki á grunni innlendrar starfsemi bankans.

Í ársreikningnum kemur fram að fjórtán og hálfur milljarður króna af hagnaðinum skýrist af endurmati á lánasafninu, þ.e útlánum bankans. Af því eru tveir milljarðar króna í lánum til einstaklinga og tólf og hálfur milljarður í útlánum til fyrirtækja. Á mannamáli þýðir þetta að bankinn er að fá miklu meira greitt af útlánum en talið var að yrði raunin þegar lánin voru færð frá Glitni til Íslandsbanka eftir hrunið.

Velta má fyrir sér í þessu ljósi hvort svigrúm bankans til afskrifta sé ekki meira úr því að stærstur hluti hagnaðarins skýrist af endurmati á útlánum.

Fyrir erlendum kröfuhöfum bankans var ein leið að ná til baka þeim fjármunum sem þeir töpuðu í hruninu að eignast hlut í Íslandsbanka, en erlendir kröfuhafar Glitnis eiga 95 prósenta hlut í bankanum. Með því „leiðréttist" í raun afslátturinn sem var veittur þegar lánin voru færð yfir, ef svo má að orði komast.

Birna Einarsdóttir bankastjóri Íslandsbanka er stödd erlendis og gat því ekki veitt fréttastofu viðtal. thorbjorn@stod2.is