Westwood í efsta sæti heimslistans

Englendingurinn Lee Westwood komst í dag í efsta sæti heimslistans í golfi en hann fagnaði sigri á móti í Indónesíu.

Landi hans, Luke Donald, átti möguleika á að komast upp í fyrsta sætið með sigri á móti í PGA-mótaröðinni í Suður-Karólínu á sama tíma.

Donald leiddi lengi vel en tapaði í bráðabana fyrir Brandt Snedeker.

Þjóðverjinn Martin Kaymer hefur verið í efsta sæti heimslistans en hann var ekki að keppa um helgina.

Westwood hélt því upp á 38 ára afmælisdaginn sinn með stæl og sungu áhorfendur afmælissönginn fyrir hann þegar að sigurinn var tryggður í Indónesíu í dag.

Hann lék á 69 höggum í dag og samtals á 269 höggum eða nítján undir pari. Thongchai Jaidee frá Tælandi kom næstur þremur höggum á eftir.