Alonso fagnar endurkomu Raikkönen

Fernando Alonso, ökumaður Ferrari fagnar því að Kimi Raikkönen er að fara keppa aftur í Formúlu 1 með liði sem kallast mun Lotus Renault á næsta ári. Raikkönen var áður hjá Ferrari, en Alonso tók sæti hans hjá liðinu, þó Raikkönen ætti enn ár eftir af samningi sínum við Ferrari liðið.

Raikkönen hætti akstri með Ferrari liðinu í Formúlu 1 í lok ársins 2009 og keppti síðan í rallakstri í tvö ár. Raikkönen gerði tveggja ára samning við Renault liðið á dögunum um að keppa aftur í Formúlu 1, en liðið verður nefnt Lotus Renault á næsta ári. Romain Groesjen mun einnig aka með liðinu. Vitaly Petrov hefur misst sæti sitt hjá Renault liðinu, þó hann hefði samning á næsta ári í höndunum.

Alonso ræddi endurkomu Raikkönen á fréttamannafundi í Madrid í vikunni.

„Ég býð hann velkominn aftur. Hann er frábær ökumaður. Hann er einn af þeim hæfileikaríkustu og hefur orðið meistari og er frábær persónuleiki. Það verður því ánægjulegt að keppa hlið við hlið við hann," sagði Alonso samkvæmt frétt á autosport.com.

„Ég er ekki að bera hann saman við neinn, en það er ekki sama hvort það er Kimi Raikkönen við hlið þér í ræsingu eða ungur ökumaður eða nýliði þegar ekið er að fyrstu beygju. Að berjast við meistara gefur þér öðruvísi tilfinningu og meira öryggi."

Alonso sagði líka að hann hefði verið hissa á að landi hans Jamie Alguersuari missti sæti sitt hjá Torro Rosso. Báðum ökumönnum Torro Rosso var skipt út fyrir næsta ár. Sebastian Buemi ekur ekki lengur með liðinu, frekar en Alguersuari. Í þeirra stað verður nýliðinn Jean Eric Vergne og Daniel Ricciardo sem ók með HRT liðinu í ár.

„Ég hef ekki sterka skoðun á þessu og veit ekki hvernig Torro Rosso starfar, eða hversu ánægðir eða óanægðir þeir voru með ökumenn sína. Ég var hissa eins og aðrir að þeir vildu skipta um báða ökumenn. Að skipta báðum út er eins og að byrja frá grunni og það verður erfiðara að þróa og prófa bílinn."

Alonso kvaðst líka hissa á því að Adrian Sutil verður ekki áfram hjá Force India liðinu, en Nico Hulkenberg kemur í hans stað sem keppnisökumaður, eftir að hafa verið varaökumaður liðsins. Paul Di Resta er áfram ökumaður Force India, en hann byrjaði að keppa á þessu tímabili.