Landsbankinn hagnaðist um 24,4 milljarða

Hagnaður Landsbankans var 24,4 milljarðar króna eftir skatta á fyrri hluta ársins. Steinþór Pálsson, bankastjóri, segir stærstan hluta hagnaðarins skýrast af gengisbreytingum á hlutafé og sölu eigna. Hagnaður vegna hlutabréfa í eigu Horns hf., sem er dótturfélag bankans, nam til að mynda 9 milljörðum króna. Bankinn sér hins vegar fyrir að tap verði af hlutabréfum á þriðja ársfjórðungi.

Hagnaður bankans af aflagðri starfsemi (discontinued operations) var 4,7 milljarðar króna. Með því er átt við þann hagnað sem hlýst þegar bankinn leggur niður hluta af starfsemi sinni og selur hann. Þar vegur þyngst salan á Vestia og Icelandic Group sem skilaði 4,1 milljarðs hagnaði.

Hagnaður af reglulegri starfsemi bankans er um 10,7 milljarðar króna.

Hins vegar rýrnaði virði útlánasafna bankans, jafnt útlánasafni til einstaklinga (um 9 milljarða) og útlánasafni til fyrirtækja (um 19 milljarða). Rýrnunina má rekja til úrræða bankans við skuldavanda heimila og fyrirtækja í kjölfar hrunsins.

Eigið fé bankans er nú 208 milljarðar króna, í samanburði við 167 milljarða á sama tíma á síðasta ári. Eiginfjárhlutfall er 22,4%

Steinþór bankastjóri segir arðsemi bankans af kjarnastarfsemi viðunandi. „Það skiptir miklu að rekstur Landsbankans gangi vel svo hægt sé að takast á við þau verkefni sem framundan eru í erfiðu umhverfi, m.a. endurreisn íslensks atvinnulífs," bætir hann við í lokin.

Í töflunni hér að neðan má samanburð á afkomu bankans milli ára.

	1H 2011	1H 2010	2010
Arðsemi eigin fjár á ársgrundvelli	24,9%	11,6%	17,3%
Hagnaður eftir skatta	24,4 milljarðar	9,4 milljarðar	27,2 milljarðar
Hagnaður af hækkun hlutabréfa	9,1 milljarður	-1 milljón	6,3 milljarðar
Tekjur af aflagðri starfsemi	4,7 milljarðar	2,8 milljarðar	2,8 milljarðar
Gengishagnaður	-139 milljónir	9,1 milljarður	14,6 milljarðar
Vaxtamunur af meðalstöðu heildareigna	3,1%	2,6%	2,3%
Eigið fé	208 milljarðar	167 milljarðar	185 milljarðar
Eiginfjárhlutfall	22,4%	16,7%	19,5%
Heildareignir	1.126 milljarðar	1.087 milljarðar	1.081 milljarður
Rekstrarkostnaður	10,8 milljarðar	9 milljarðar	18,5 milljarðar