Tískuviðburður í Kronkron á Menningarnótt

Á menningarnótt verður uppi heljarinnar húllumhæ í versluninni Kronkron við Laugaveg. Aðdáendur Kron by Kronkron gleðjast eflaust yfir því að ný vetrarlína merkisins verður komin í hús en einnig ætlar Hildur Yeoman fatahönnuður að sýna nýja fylgihlutalínu sína, Cherry Bomb Collection.

Um kvöldið má síðan búast við því að tískuóðir bíði spenntir eftir því þegar dregið verður í happdrætti þar sem vinningarnir eru bæði frá Kron by Kronkron og Hildi Yeoman.

Hildur sýnir einnig ljósmyndaverk sem unnin voru af henni og Sögu Sigurðardóttur ljósmyndara í tengslum við Cherry Bomb línuna. Hún ætlar síðan að taka gluggann á versluninni í gegn og leiða saman Kron by kronkron og hönnun sína á skemmtilegan hátt. Gleðin stendur yfir allan daginn og langt fram á kvöld, frá klukkan 10 til 22.30, og eru allir velkomnir. Um kvöldið verður jafnframt lifandi tónlist, en jassgeggjararnir í Tríó Bók munu gleðja gesti og gangandi.

Skóverslunin Kron að Laugavegi 48 mun einnig skarta sínu fegursta á menningarnótt. Listakonurnar Guðrún Tara Sveinsdóttir og Elizabeth Sonenberg, búsett í New York, sýna verk í glugganum og því verður ásýnd verslunarinnar með óhefðbundnu móti þennan dag.

Ljósmyndir eftir Sögu Sigurðardóttur af Kron by Kronkron munu prýða veggina og verður tekið vel á móti gestum og gangandi sem mæta í miðbæinn til að njóta Menningarnætur.