Viðskipti innlent

Vísar gjaldþroti OR á nýjan meirihluta

Guðlaugur Sverrisson
Guðlaugur Sverrisson
Guðlaugur Sverrisson, fyrrverandi stjórnarformaður Orkuveitu Reykjavíkur, segir stöðu Orkuveitunnar hafa verið komna í ásættanlegt horf þegar hann lét af störfum í júní á síðasta ári. Hann spyr hvað breyttist.

Í yfirlýsingu sem hann sendi á fjölmiðla skrifar hann: „Orkuveita fékk lán afgreidd allan þann tíma er undirritaður var stjórnarformaður. Hvað breyttist eftir júní 2010? Núverandi forstjóri hefur staðfest án frekari skýringa að skyndilega um áramótin 2011 hafi viðhorf til félagsins gjörbreyst. Höfðu þá nýir stjórnendur setið að félaginu í hálft ár, skipt um forstjóra, sett bráðabirgðaforstjóra og hækkað gjaldskrá á almenning."

Guðlaugur rekur sögu Orkuveitunnar frá því hann tók við sem stjórnarformaður. Hann segir meðal annars í yfirlýsingunni að allan þann tíma sem hann starfaði sem stjórnarformaður áttu stjórnendur OR í góðu samstarfi við lánardrottna sem byggt var á trausti en þeir sýndu félaginu skilning á erfiðum tímum.

Á árinu 2009 fékk OR lán afgreitt frá Evrópska þróunarbankanum (CEB) upp á 6-7 milljarða. Í nóvember sama ár fékkst lán frá Evrópska fjárfestingabankanum (EIB) upp á 30 milljarða. Í janúar 2010 fóru fjármálastjóri Reykjavíkur og fjármálstjóra OR til fundar við Norræna fjárfestingarbankann (NIB).

Þar var lýst yfir að mikill vilji væri til að lána OR um 12-14 milljarða. NIB setti þó fram þau skilyrði að hækkunarþörf á gjaldskrá OR yrði staðfest í þriggja ára áætlun félagsins . Seld voru skuldabréf á markaði fyrir um 5 milljarða á árinu 2010. Í júní 2010 er undirritaður lætur af stöfum sem stjórnarformaður OR voru engin vandkvæði á því að NIB muni lána fyrrgreinda upphæð til landsins að skilyrðum uppfylltum.

Í lok yfirlýsingarinnar furðar Guðlaugur sig á því hvað hafi breyst og spyr:

„Getur verð að yfirlýsingar stjórnenda og eigenda um stöðu og greiðslugetu OR hafi haft áhrif til hins verra við útvegun fjármagns til rekstrar OR? Fullyrðingar nýrra stjórnenda OR um gjaldþrot fyrirtækisins er algjörlega á þeirra ábyrgð."

Yfirlýsinguna má lesa í heild sinni hér fyrir neðan.


Tengdar fréttir

Orkuveitan fær 11,3 milljarða frá borginni

Reykjavíkurborg mun lána Orkuveitunni 11,3 milljarða króna til þess að rétta af fjárhag fyrirtækisins. Þetta var samþykkt á borgarráðsfundi í dag en borgarstjóri lagði tillöguna fram. Bróðurpartur lánsins verður greiddur út þann 1. apríl næstkomandi eða 7,4 milljarðar en eftirstöðvarnar á fyrri hluta árs 2013.

Orkuveitan: Hefðu ekki getað borgað laun án björgunarpakkans

Orkuveitan er gjaldþrota fyrirtæki að mati Bjarna Bjarnasonar forstjóra Orkuveitunnar og hefði ekki getað borgað starfsfólki laun án björgunarpakkans sem samþykktur var í dag. Stofnuð hefur verið sérstök rannsóknarnefnd sem fara mun yfir málefni Orkuveitunnar.

Forstjóri OR með 1,3 milljónir á mánuði

Forstjóri Orkuveitunnar er með 1,3 milljónir á laun á mánuði. Hann boðar nýjan hugsunarhátt hjá fyrirtækinu og segir alla þurfa að herða sultarólina. Formaður borgarráðs segir samfélagið þurfa að sýna samstöðu með Orkuveitunni til að tryggja endurreisn fyrirtækisins. Bjarni Bjarnason, forstjóri Orkuveitunnar, boðaði í gær nýja tíma og hugsun hjá fyrirtækinu en björgunarpakki borgarinnar felur í sér 12 milljarða króna víkjandi lán frá eigendum til Orkuveitunnar sem kemur á móti umfangsmiklum niðurskurðaraðgerðum hjá Orkuveitunni sjálfri. Bjarni Bjarnason sagði að nú þyrftu menn að herða sultarólina. "Það sem við erum að gerast snýst um lágmarksarðsemi. Greiðsluþol almennings er ekki mikið. Við vvildum sjá hærri arðsemi en við munum herða ólina allsstaðar og líka hjá okkur sjálfum,“ segir Bjarni. Meðal aðgerða Orkuveitunnar er fækkun starfsfólks og sala eigna. Spurður hvað hann væri sjálfur með í laun svaraði Bjarni: "Ég er með 1340 þúsund.“ Þegar fréttamaður spurði Bjarna hvort hann stefndi á að lækka laun sín, svaraði hann: "Þessi laun hafa lækkað um 40%, meiri launaskerðing en hjá flestum,“ segir hann. Haraldur Flosi Tryggvason, stjórnarformaður Orkuveitunnar, sagði að stjórnin hefði ákveðið að laun forstjóra fylgdu kjararáðsúrskurði um sambærilegar stöður hjá sambærilegum fyrirtækjum. Dagur B. Eggertsson borgarfulltúi var þá spurður hvort hægt væri að bera Orkuveitu reykjavíkur við önnur orkufyrirtæki - fréttir dagsins væru jú þær að Orkuveitan væri tæknilega gjaldþrota. "Ég held við ættum frekar að miða laun Bjarna við lækninn sem kemur á slysstað en þann sem veldur slysinu,“ segir Dagur.



Mest lesið


Fleiri fréttir

Sjá meira


×

Mest lesið