Nýr samningur sparar Landspítalanum 8 milljónir á ári

Björn Zoëga forstjóri Landspítalans segir að nýr samningur við Íslandsbanka muni spara spítalanum 8 milljónir kr. á ári. Samningurinn var undirritaður í hádeginu.

Í tilkynningu segir að Landspítali hafi gert samning við Íslandsbanka um banka- og innheimtuþjónustu spítalans, á grundvelli útboðs Ríkiskaupa sem opnað var í desember 2010. Það eru nýmæli að ríkisstofnun bjóði út alla bankaþjónustu og er Landspítali þannig að ryðja braut sem ætti að koma öðrum stofnunum að gagni.

Um er að ræða nánast öll bankaviðskipti og tengda þjónustu svo sem innlánsviðskipti á tékkareikningum og skammtímabankareikningum, útlánsviðskipti, aðgang að fyrirtækjabanka ásamt bankaþjónustu vegna ýmissa sérsjóða sem fjármálasvið Landspítala heldur utan um. Ennfremur nær samningurinn til þjónustu, gjaldskrár og greiðsluskila vegna innheimtukrafna Landspítala. Íslandsbanki mun einnig veita spítalanum reglulega upplýsingar er varða hagspár, vaxtaþróun, gengisþróun erlendra gjaldmiðla og ávöxtunarmöguleika.

Samningurinn var undirritaður af Birni Zoëga forstjóra Landspítala og Birnu Einarsdóttur bankastjóra Íslandsbanka í K-byggingu Landspítalans.

„Þetta er tímamótasamningur fyrir Landspítalann sem mun skila um 8 milljóna króna hagræðingu á þessu ári og enn meiri á næsta ári. Samningurinn er þannig liður í því að reyna að hagræða alls staðar í starfsemi spítalans á erfiðum tímum,” segir Björn Zoëga, forstjóri Landspítala.

„Við hjá Íslandsbanka hlökkum til samstarfsins við Landspítalann. Landspítalinn er stærsti vinnustaður landsins og hefur staðið frammi fyrir miklum áskorunum síðustu misseri. Þetta útboðsferli sýnir að stjórnendur spítalans takast á við þær áskoranir á afar faglegan hátt,” segir Birna Einarsdóttir, forstjóri Íslandsbanka.