Íslandsbanki kærir Capacent fyrir meint kennitöluflakk

Íslandsbanki hefur formlega lagt fram kæru á hendur stjórnendum Capacent ehf. vegna viðskipta frá 15. september 2010 þegar eignir Capacent voru keyptar út úr félaginu, sem síðan var gefið upp til skipta. Þetta kemur fram í Viðskiptablaðinu í dag.

Þar segir að skiptastjóri Capacent, Guðrún Helga Brynleifsdóttir, telur að eignirnar hafi verið seldar á undirverði úr félaginu og að þær hafi, a.m.k. að hluta, verið veðsettar kröfuhafa félagsins, Íslandsbanka.

Forsvarsmenn Capacent, þar sem starfsmenn félagsins eiga nú um 60% hlut, hafa alfarið hafnað því að þeir hafi brotið lög er félag þeirra, sem þá hét CC 200 ehf., keypti eignir úr félaginu sem nú er í slitameðferð.

Samkvæmt frétt Viðskiptablaðsins var kaupverðið um 90 milljónir króna. Um það hefur verið deilt hvort það var sanngjarnt, en ekkert verðmat lá til grundvallar er gengið var frá kaupunum.

Forsvarsmenn Capacent ehf. fengu hins vegar sérfræðinga til þess að verðmeta það sem til grundvallar lá eftir að viðskiptin áttu sér stað. Samkvæmt því mati var verðmiðinn í takti við eignavirði.

En eins og áður segir eru skiptastjóri GH1, sem áður var Capacent hf., og kröfuhafinn Íslandsbanki alls ekki sammála þessu. Í stuttu máli telja þau að forsvarsmenn Capacent hafi ólöglega flutt eignir yfir á nýja kennitölu skömmu áður en það var tekið til skipta.