Malmö enn taplaust á toppnum - Margrét Lára skoraði

Þóra B. Helgadóttir, Dóra Stefánsdóttir og félgar í LdB Malmö eru enn taplaus á toppi sænsku úrvalsdeildarinnar í knattspyrnu en liðið vann í dag 4-0 sigur á Hammarby.

Þóra stóð í marki liðsins í dag en Dóra er enn frá vegna meiðsla. Malmö er með 34 stig af 36 mögulegum í deildinni og með markatöluna 34-7.

Kristianstad gerði 1-1 jafntefli við Sunnanå á útivelli í dag og skoraði Margrét Lára Viðarsdóttir jöfnunarmark fyrrnefnda liðsins á lokamínútu leiksins.

Margrét Lára, Guðný Björk Óðinsdóttir og Erla Steina Arnardóttir léku allan leikinn fyrir Kristianstad í dag en Katrín Ómarsdóttir var á bekknum. Elísabet Gunnarsdóttir er þjálfari liðsins.

Kristianstad er í sjötta sæti deildarinnar með átján stig.