Bjóða endurreikning húsnæðislána

Íslandsbanki hefur ákveðið að bjóða viðskiptavinum sínum sem skulda húnæðislán í erlendum gjaldmiðlum, með veði í eigin íbúðarhúsnæði, að endurreikna þau í samræmi við ákvæði frumvarps til breytinga á vaxtalögum. Viðskiptaráðherra lagði frumvarpið fram á Alþingi eftir gengisdóm Hæstaréttar.

Þessar aðgerðir segist bankinn ætla að fara í þótt enn ríki óvissa um lögmæti erlendra húsnæðislána bankans og nýlegir héraðsdómar renni stoðum undir lögmæti samninganna. Bankinn segir að þessi vinna sé þegar hafin og gert sé ráð fyrir að henni ljúki á fyrstu mánuðum nýs árs.

Í yfirlýsingu frá Íslandsbanka er fagnað þeim áfanga sem náðst hefur með viljayfirlýsingu ríkisstjórnar, fjármálafyrirtækja, Íbúðalánasjóðs og lífeyrissjóða um aðgerðir vegna skuldavanda heimilanna. Segir að Íslandsbanki muni nú hið allra fyrsta útfæra nánar þær aðgerðir sem fram koma og kynna þær fyrir viðskiptavinum. Sú vinna verði unnin eins hratt og hægt sé og niðurstaða hennar verði kynnt á næstu dögum.

Viðskiptavinir Íslandsbanka sem nýtt hafi sér þau úrræði sem bankinn hafi boðið á undanförnum misserum muni njóta betri réttar gangi þær úrlausnir sem í samkomulaginu felast lengra en þau úrræði sem bankinn hafi boðið hingað til.