Már vildi ekki Heiðar Má og tilkynnti það símleiðis

Már Guðmundsson, seðlabankastjóri, tilkynnti Heiðari Má símleiðis að hann vildi ekki að hann yrði meðal þeirra fjárfesta sem keyptu Sjóvá en seðlabankastjóra grunaði Heiðar Má um viðskipti með aflandskrónur í gegnum félag sitt Ursus capital ehf.

Hópur fjárfesta undir forystu Heiðars Más Guðjónssonar sem hafði freistað þess að kaupa tryggingafélagið Sjóvá dró sig út úr söluferlinu á fyrirtækinu, sem hafði staðið yfir í tæpa tíu mánuði, vegna seinagangs Seðlabankans. Hópurinn hafði gefið Seðlabankanum frest til 22. október til að ganga frá samningunum en tilkynnti svo á mánudaginn síðastliðinn, um mánuði síðar, að hann hefði dregið sig út úr ferlinu.

Fram kemur í Viðskiptablaðinu í dag að aðeins hafi átt eftir að ganga frá ýmsum lausum endum í tengslum við söluna þegar Már Guðmundsson, seðlabankastjóri, hringdi í Heiðar Má hinn 7. október síðastliðinn og tilkynnti honum að hann treysti sér ekki til þess að ganga frá samningnum þar sem mál sem tengdist félagi Heiðars Más, Ursus ehf., væri til rannsóknar hjá gjaldeyriseftirliti Seðlabankans vegna aflandskrónuviðskipta í tengslum við skuldabréfaútgáfu félagsins í júní.

Viðskiptablaðið greinir frá því að Heiðar Már hafi svarað því til að eini tilgangur skuldabréfaútgáfunnar hafi verið að uppfylla skilyrði til þess að ganga frá kaupum á Sjóvá, engar reglur hafi verið brotnar. Auk þess hafi þeim skilaboðum verið komið til Seðlabankans að kaupin á Sjóvá væru ekki fjármögnuð með aflandskrónum, en skuldabréfaútgáfan var upp á 490 milljónir króna.

Sagði seðlabankastjóra brjóta stjórnsýslulög

Föstudaginn 22. október fundaði seðlabankastjóri, ásamt Arnóri Sighvatssyni, aðstoðarseðlabankastjóra og Sigríði Logadóttir, aðallögfræðingi Seðlabankans, með Heiðar Má og tveimur lögmönnum hans, Reimari Péturssyni og Birgi Tjörva Péturssyni. Á þessum fundi greindi seðlabankastjóri frá því að að mál sem tengdust Ursusi yrði vísað til lögreglu eftir helgina. Viðskiptablaðið greinir frá því að Reimar hafi mótmælt þessu harðlega og sagt seðlabankastjóra brjóta stjórnsýslulög þar sem engar skýringar hefðu borist á því hvað væri til rannsóknar og hvaða meintu brot hefðu átt sér stað. Eftir það hafi söluferlið komist í uppnám og svo fór að á mánudaginn sl., mánuði síðar, dró hópurinn sig út úr söluferlinu.

Engin tilkynning hefur verið send frá Seðlabankanum til lögreglu um meint brot Ursusar. Heiðar Már hefur sem kunnugt er kvartað til umboðsmanns Alþingis vegna framferðis Seðlabankans í söluferlinu. Heiðar Már sakar Seðlabankann um valdníðslu í yfirlýsingu sem hann sendi frá sér í gær. Heiðar Már segir að inn í stjórnsýsluframkvæmdina hafi blandast ómálefnaleg sjónarmið, pólitík og persónuleg sjónarmið. Seðlabankinn vill ekki tjá sig um málið.