Enn er vart búið að ná botninum á íbúðamarkaði

Greining Íslandsbanka segir að samkvæmt niðurstöðum mælinga er ljóst að verulega hefur hægt á verðlækkunum á íbúðamarkaði. Hinsvegar er enn of snemmt að segja að botninum sé náð á íbúðamarkaði þar sem að miklar sveiflur eru á milli mánaða í þessum mælingum og enn ekki útséð með að verðlækkanirnar séu að baki endanlega.

Fjallað er um málið í Morgunkorni greiningarinnar. Þar segir að íbúðaverð á landinu öllu hefur nú lækkað um 1,7% á undanförnum 12 mánuðum. Tólf mánuðina þar á undan lækkað íbúðaverðið um 8,5%. Samhljómur er með þessum mælingum og mælingum Þjóðskrár Íslands á íbúðaverði en samkvæmt þeim síðarnefndu hefur íbúðaverð á höfuðborgarsvæðinu lækkað um 3,2% undanfarna 12 mánuði en á sama tíma í fyrra hafði íbúðaverð í þeirra bókum lækkað um 10,2%.

Þá ber að hafa í huga að mælingarvandinn vegna fæð samninga sem gæti verið að skekkja myndina. Frá því að íbúðaverð náði hámarki í lok árs 2007 hefur það lækkað um 13% að nafnverði og um rúm 35% að raunvirði. Lunginn af þeim verðlækkunum sem við munum sjá í þessari kreppu er líklega kominn fram þó að enn sé talsverð óvissa framundan á íbúðamarkaði.

„Engu að síður má telja líklegt að hægfara viðsnúningur sé framundan á íbúðamarkaði og botninn í sjónmáli. Það sem styður þá þróun er meðal annars viðsnúningur í kaupmætti, hjöðnun verðbólgu, styrking á gengi krónunnar, lægri vextir og hin almenni viðsnúningur í hagkerfinu sem framundan er," segir í Morgunkorninu.

„Taki hagkerfið við sér á næsta ári eins og spár gera ráð fyrir mun íbúðamarkaðurinn fylgja með. Það sem hinsvegar helst gæti staðið í vegi fyrir áframhaldandi viðsnúningi á íbúðamarkaði er bakslag í efnahagsbatanum, viðvarandi óvissa varðandi skuldastöðu heimilanna, bakslag á vinnumarkaði og viðvarandi fólksfækkun."