Segir stjórnmálamenn eigi ekki að líða fyrir stöðu sína

Landsbankinn segir í yfirlýsingu um afskriftir á skuldum Nónu ehf., að þær hafi verið eðlilegar og að fyrrverandi eða núverandi stjórnmálamenn eigi ekki að líða fyrir stöðu sína.

Það var Kastljós sem sagði frá því að Landsbankinn hefði afskrifað 2,6 milljarða skuld félagsins Nónu, sem er í eigu Skinneyjar-Þinganess. Meðal hluthafa í Skinney-Þinganess er Halldór Ásgrímsson, fyrrverandi forsætisráðherra.

Í yfirlýsingu frá bankanum, sem berst um þremur vikum eftir að fréttin birtist í Kastljósi, segir að bankinn hafi farið í einu og öllu eftir verklagsreglum við afskriftirnar.

Skuldir fyrirtækisins voru færðar niður í 100% af eignavirði til samræmis við þágildandi reglur bankans og eigendur lögðu félaginu til nýtt fé samhliða þeirri niðurfærslu samkvæmt tilkynningunni.

Þá segir ennfremur að í dag heimila reglur bankans niðurfærslu skulda í 90% af eignavirði samhliða 10% framlagi eigenda. Öllum fyrirtækjum með greiðslugetu standi sú leið til boða.

Landsbankinn segist leggja ríka áherslu á að endurskipuleggja skuldir lífvænlegra fyrirtækja í samræmi við vilja yfirvalda og hefur í því sambandi talið mikilvægt að vernda störf og lífsafkomu fólks. Með það fyrir augum var samningur um niðurskrift skulda Nónu ehf. gerður eins og fram kemur í tilkynningunni en hana má lesa í heild sinni hér fyrir neðan.