HM í handbolta á Stöð 2 Sport

Undirritaðir hafa verið samningar um sýningu næstu tveggja heimsmeistaramóta í handbolta á Stöð 2 Sport. Næsta mót verður í Svíþjóð, en íslenska landsliðið mun verða þar í eldlínunni eins og landsmönnum er kunnugt.

HM í Svíþjóð stendur frá 13.-30. janúar og mun Stöð 2 Sport gera mótinu góð skil auk þess sem valdir leikir verða sýndir í háskerpu. Mikil eftirvænting er fyrir mótið enda vann liðið silfur á síðustu Ólympíuleikum og brons á síðasta Evrópumóti.

„Við erum mjög spennt fyrir þessu verkefni, enda hefur velgengni íslenska handboltalandsliðsins verið ótrúleg á síðustu tveimur stórmótum. Við munum leggja mikinn metnað í umfjöllun um mótin, bæði í þáttagerð í tengslum við þau og sýna alla leiki í beinni útsendingu og nýta hliðarrásir sportstöðvanna þegar þess gerist þörf,“ segir Pálmi Guðmundsson framkvæmdastjóri dagskrársviðs 365 miðla.