Ræsingin lykill að sigri í Singapúr

Heimsmeistarinn Jenson Button hjá McLaren telur að höfuðatriði sé að ná góðri ræsingu í upphafi Formúlu 1 mótsins í Singapúr í dag. Hann er meðal fimm ökumanna í slag um meistaratitilinn, þegar fimm mótum er ólokið. Bein útsending er frá mótinu í Singapúr í opinni dagskrá á Stöð 2 Sport kl. 11.30 í dag og þátturinn Endamarkið er strax að honum loknum. Í honum er farið yfir allt það besta úr mótinu. Fernando Alonso á Ferrari er fremstur á ráslínu í Singapúr, við hlið hans Sebastian Vettel á Red Bull. Lewis Hamilton á McLaren er þriðji, Button fjórði og Mark Webber fimmti en hann er efstur í stigamótinu. Er með 5 stiga forskot á Hamilton. Þessir fimm ökumenn er í titilslagnum "Ræsingin er lykillinn. Að ræsa vel af stað er mjög mikilvægt. Mitt vandamál að liðsfélagi minn er á samskonar bíl við hliðina á mér og hann mun ræsa af stað jafnvel og ég. Ég mun ekki komast framúr honum í ræsingunni, en maður veit þó aldrei fyrir fyrir fyrstu beygju", sagði Button í frétt á autosport.com. "Vettel hefur byrjað illa í mörgum mótum að undanförnu. Ég er ekki að segja að það sé honum að kenna, en Red Bull bíllinn hefur ekki ræst vel af stað. Það er jákvætt fyrir okkur", sagði Button, sem ætlar að berjast til sigurs eins og allir ökumennirnir í titilslagnum. Hvert stig er mikilvægt og Button hefur titil að verja. Brautarlýsingu og tölfræði um mótshelgina má finna á htttp://www.kappakstur.is