OECD: Dekkri efnahagshorfur fyrir Ísland

Í nýrri skýrslu frá OECD um efnahagshorfur á Íslandi kemur fram að stofnunin telur horfurnar nú dekkri en fram kom í samskonar skýrslu s.l. vor. Nú telur OECD að hagvöxtur á næsta ári verði 1,5% en í vor taldi stofnunin að hann yrði 2,2%.

Jafnframt telur OECD að viðsnúningur í efnahagslífinu verði ekki fyrr en á seinnihluta næsta árs. Í vor taldi stofnunin að þessi viðsnúningur yrði á seinnihluta þessa árs.

Hvað hagvöxtinn í ár verðar telur OECD nú að hann verði neikvæður um 3,6% sem er töluverð breyting frá skýrslunni í vor þegar stofnun taldi að hagvöxturinn yrði neikvæður um 2,2%.

Af öðrum lykiltölum í skýrslu OECD hvað Ísland varðar segir að atvinnuleysið í ár nemi 7,5% sem er nokkuð minna en í skýrslunni s.l. vor þegar atvinnuleysið var talið verða 8,7%. Spáin um atvinnuleysi á næsta ári er 8,1% sem er svipað og í skýrslunni í vor.

Hvað hallann á fjárlögum varðar eru litlar breytingar frá skýrslunni í vor. Nú telur OECD að hallinn verði 6,3% af landsframleiðslu í ár og 2,7% á næsta ári. OECD gerir svo ráð fyrir 0,6% afgangi á fjárlögum árið 2012.

Verðbólguspá OECD er mun betri nú en s.l. vor. Þannig gerir stofnunin ráð fyrir að verðbólgan á næst ári verð 1,8% en í vor taldi OECD að verðbólgan yrði 4,2% á næsta ári.