Íslensku stelpurnar eru ekki einu nýliðarnir á EM - dregið á laugardag

Það varð ljóst um helgina hvaða sextán þjóðir verða í lokakeppni Evrópumóts kvennalandsliða í handbolta sem fer fram í Danmörku og Noregi 7. til 19. desember á þessu ári.

Íslenska kvennalandsliðið náði eins og kunnugt er sögulegum áfanga um helgina þegar stelpurnar tryggðu sér sæti í úrslitakeppni stórmóts í fyrsta sinn. Liðið endaði í 2. sæti í sínum riðli á eftir geysisterku liði Frakklands.

Íslensku stelpurnar eru ekki einu nýliðarnir á EM því Svartfjallaland var einnig að komast í lokakeppni EM í fyrsta sinn. Allar aðrar þjóðir í keppninni hafa mun meiri reynslu eins og sjá má á töflunni hér fyrir neðan.

Það verður dregið í riðla í Óðinsvéum laugardaginn 5. júní og mun drátturinn fara fram í hálfleik á æfingalandsleik gestgjafana Dana og Norðmanna. Það verður dregið í fjóra fjögurra liða riðla þar sem þrjú efstu liðin komast síðan áfram í milliriðil.

Þjóðir í úrslitakeppni EM kvenna í handbolta 2010:

Danmörk (9 EM-keppnin)

Noregur (9)

Ungverjaland (9)

Frakkland (6)

Þýskaland (9)

Spánn (6)

Svartfjallaland (Nýliði)

Rússland (9)

Króatía (6)

Rúmenía (8)

Úkraína (9)

Ísland (Nýliði)

Slóvenía (4)

Holland (4)

Svíþjóð (7)

Serbía (3)