Bann við liðsskipunum fellt niður

Akstursíþróttaráð FIA ákvað í dag á fundi í Mónakó að fella niður reglu sem segir að liðsskipanir í Formúlu 1 séu bannaðar, en nokkrar reglubreytingar voru gerðar á fundinum í dag. Regla 39.1 sem bannar liðsskipanir hefur verið felld úr reglum FIA, en uppi varð fótur og fit í sumar þegar Felipe Massa hleypti Fernando Alonso framúr sér í keppni í Þýskalandi, þannig að Alonso fengi fleiri stig. Ferrrari fékk 100.000 dala sekt fyrir uppátækið, var talið hafa beitt liðsskipunum til að hagræða stöðu ökumanna sinna en báðir ökumenn og Ferrari hélt stigum sínum og FIA hugðist endurskoða reglurnar eftir það eins og segir í frétt á autosport.com í dag. FIA bendir samt sem áður á að regla sé til staðar sem gætir þess að keppnislið geti ekki skaðað íþróttina með aðgerðum sínum. Það er regla 151c í alþjóðlegum keppnisreglum FIA, þó bann við liðsskipunum hafi verið fellt út sem slíkt.