Garðar og félagar komust í bikarúrslitaleikinn

Garðar Jóhannsson og félagar hans í Strømsgodset tryggðu sér sæti í bikaúrslitaleiknum í Noregi með 2-0 sigri á Odd Grenland í framlengdum undanúrslitaleik í kvöld.

Garðar var í byrjunarliði Strømsgodset og lék fyrstu 106 mínútur leiksins en skömmu áður en honum var skipt útaf þá komst liðið í 1-0 með marki frá Jason Morrison. Ola Kamara innsiglaði síðan sigurinn á 119. mínútu.

Árni Gautur Arason sat á varamannabekknum hjá Odd Grenland í leiknum.

Þetta er í fyrsta sinn síðan 1997 sem Strømsgodset kemst í bikarúrslitaleikinn en liðið mætir þar Folla sem sló óvænt út Rosenborg í hinum undanúrslitaleiknum fyrr í dag.