Annar maður handtekinn

Nú síðdegis handtók sérstakur saksóknari einn mann til viðbótar í tengslum við sömu rannsókn og Hreiðar Már Sigurðsson, fyrrverandi forstjóri Kaupþings var handtekinn í dag. Hreiðar er grunaður um fjölmörg brot í starfi.

Ekki fæst uppgefið um hvern er að ræða. Samkvæmt upplýsingum fréttastofunnar eru fangelsin á Litla Hrauni og við Skólavörðustíg yfirfull og því er líklegt að Hreiðari Má og manninum sem handtekinn var síðdegis verði áfram haldið föngnum á lögreglustöðinni á Hverfisgötu.

Farið var fram á tveggja vikna gæsluvarðhald í Héraðsdómi Reykjavíkur fyrr í dag. Dómari tók sér sólarhrings umhugsunarfrest og verður Hreiðar Már því í haldi lögreglu að minnsta kosti til morguns. Ólafur Þór Hauksson, sérstakur saksóknari, segir að Hreiðar Már hafi verið handtekinn við lok skýrslutöku.

Hreiðar Már var áberandi í íslensku viðskiptalífi. Hann hóf störf hjá Kaupþingi árið 1994. Níu árum síðar varð hann forstjóri en hann hafði verið aðstoðarforstjóri um nokkurt skeið. Hann gegndi því starfi þar til bankinn fór í þrot í október 2008. Laun Hreiðars voru talin í milljörðum króna en samkvæmt rannsóknarskýrslunni fékk hann rúma þrjá milljarða króna í laun á árunum 2004-2008. Hreiðar var lengi vel skattakóngur í Reykjavík og á landsvísu. Eftir hrunið stofnaði hann ráðgjafafyrirtækið Consolium ásamt Ingólfi Helgassyni sem einnig gegndi stöðu forstjóra bankans. Þeir félagar opnuðu svo útibú í Lúxemborg og er Hreiðar Már skráður með lögheimili þar.

Sérstakur saksóknari hefur að undanförnu haft nokkur mál varðandi starfsemi Kaupþings til rannsóknar, t.a.m. meinta allsherjarmarkaðsmisnotkun og meint sýndarviðskipti sjeiksins Al Thani. Í febrúar var svo gerð húsleit í Banque Havilland í Lúxemborg sem áður var dótturfélag Kaupþings.