Öllum framkvæmdastjórum Landsbankans sagt upp

Öllum núverandi framkvæmdastjórum Landsbankans, átta að tölu, verður sagt upp og stöður þeirra auglýstar lausar til umsóknar. Þetta er á meðal þess sem kom fram þegar Steinþór Pálsson bankastjóri kynnti í gær nýtt skipurit fyrir starfsmönnum í gær.

Samkvæmt nýja skipuritinu verða meginsvið bankans átta talsins og verða stöður framkvæmdastjóra þeirra allar auglýstar til umsóknar. Gömlu framkvæmdastjórarnir hafa verið hvattir til að sækja um stöður sínar að nýju.

Í tilkynningu um málið á heimasíðu bankans segir að bankastjóri og bankaráð Landsbankans leggi mikla áherslu á að stjórnendur sæki sér nýtt og óskorað umboð og að samhentur forystuhópur myndist um ný markmið og stefnu bankans.