Hrafnhildur: Mjög góð stemning í liðinu

„Þetta var svipað og við mátti búast en við áttum bara að vera löngu búnar að klára þetta í fyrri hálfleik. Við hefðum átt að vera svona tíu til tólf mörkum yfir í hálfleik miðað við hvernig leikurinn spilaðist," sagði Hrafnhildur Skúladóttir, leikmaður Vals, eftir nauman sigur 20-19 gegn Fram í fyrstu viðureign liðanna í úrslitaeinvíginu í N1-deild kvenna í handbolta.

„Ég var rosalega ánægð með fyrri hálfleikinn fyrir utan þessi færi sem að við vorum að klikka á. Við vorum að klúðra endalaust af dauða færum á meðan að þær komast hvorki lönd né strönd. Þær skutu varla á markið því við spiluðum svo góða vörn. Það er synd að þetta skuli hafa endað í svona spennu," sagði Hrafnhildur.

Hrafnhildur segir liðsheildina vera mjög sterka á Hlíðarenda og hefur enga trú á því að það breytist.

„Við mætum alveg vitlausar til leiks á þriðjudaginn og ætlum okkur ekkert að fara gefa neitt eftir. Það er mjög góð stemning í liðinu og veturinn búinn að vera frábær. Við erum deildarmeistarar og þann titil er erfiðast að vinna. Töpuðum bara einum leik þannig að liðsheildin er búin að vera frábær í allan vetur og heldur þannig áfram," sagði Hrafnhildur sátt með sigurinn í leikslok.