Gleðipinninn Ronaldinho sektaður af AC Milan

Samkvæmt ítölskum fjölmiðlum hefur Brasilíumaðurinn Ronaldinho hjá AC Milan verið sektaður af félaginu eftir að upp komst að hann hafi farið út að skemmta sér á skemmtistað í vikunni fyrir grannaslaginn gegn Inter í ítölsku deildinni á dögunum.

„Derby della Madonnina" eins og grannaslagir félaganna eru kallaðir eru vitanlega stærstu leikir ársins í deildinni hjá þessum félögum og sér í lagi í ljósi þess sem Inter vann leikinn 2-0 þá fær Ronaldinho að kenna á því.

Þetta er heldur ekki í fyrsta skipti heldur fjórða skipti á tímabilinu sem gleðipinninn Ronaldinho hefur verið gripinn glóðvolgur úti að skemmta sér í leyfisleysi en hann mun borga sekt sína til Milan stofnunarinnar sem styrkir ýmis góðgerðarmálefni.