Ranieri: Ég er orðinn mjög þreyttur á Mourinho

Claudio Ranieri, þjálfari Roma, lét Jose Mourinho loksins aðeins heyra það á blaðamannafundi í gær fyrir lokaumferð ítölsku úrvalsdeildarinnar sem fram fer í dag.

Ranieri hefur oft verið skotspónn portúgalska stjórans en Mourinho tók á sínum tíma við af Ranieri hjá Chelsea og hefur hvað eftir annað reynt að gera lítið úr afrekum Ranieri.

„Ég hlýt að eiga stað í hjarta hans því hann er alltaf að tala um mig. Ég er samt orðinn mjög þreyttur á vitleysunni sem kemur frá Mourinho og ef ég segi alveg eins og er þá gæti mér ekki verið meira saman um hvað hann er að hugsa," sagði Claudio Ranieri.

Inter er með tveimur stigum meira en Roma og nægir að vinna Chievo á útivelli en Roma þarf að vinna sinn leik á móti Siena og treysta síðan á hagstæð úrslit.