Stuðningsmenn Lazio fögnuðu sigri Inter gegn sínum mönnum

Inter er með tveggja stiga forystu á Roma í ítalska boltanum þegar tvær umferðir eru eftir. Inter vann 2-0 útisigur gegn Lazio í kvöld og trónir enn á toppnum.

Lazio eru erkifjendur Roma. Það var því sérkennilegt andrúmsloft í kvöld þar stuðningsmenn Lazio í stúkunni héldu með Inter enda vilja þeir síst af öllu að Roma hrósi sigri í deildinni.

Inter náði 2-0 sigri við þessar skringilegu kringumstæður en Walter Samuel og Thiago Motta skoruðu mörkin. Lazio er í sextánda sæti deildarinnar.