Sturla til liðs við Val

Landsliðsmaðurinn Sturla Ásgeirsson mun leika með Val í N1-deild karla á næstu leiktíð en hann hefur gert eins árs samning við félagið.

Þetta kom fram á heimasíðu Vals nú í morgun en Sturla var síðast á mála hjá Düsseldorf í þýsku úrvalsdeildinni.

Júlíus Jónasson mun stýra liði Vals á næstu leiktíð en hann var áður þjálfari ÍR sem Sturla lék með á sínum tíma.

Hann hefur verið fastamaður í íslenska landsliðinu undanfarin ár og vann til silfurverðlauna með liðinu á Ólympíuleikunum í Peking og brons á EM í Austurríki í janúar.