Von um lausn Icesavedeilunnar lækkar skuldatryggingaálagið

Svo virðist sem fréttir um hagstæða niðurstöðu í yfirstandandi Icesave viðræðum hafi lækkað nokkuð skuldatryggingaálag Íslands.

Fjallað er um þetta mál í Markaðsfréttum Íslenskra verðbréfa. Þar segir að skuldatryggingaálag á ríkissjóð lækkaði nokkuð skarpt í síðustu viku og virðist vera að fréttir um að hagstæð niðurstaða sé að nást í Icesave málinu sé að hafa þar áhrif. Álagið fór úr 305 punktum og niður fyrir 286 punkta.

Hinsvegar segir í Markaðsfréttunum að stjórnvöld hafa áður talið sig vera með „hagstæðann Icesavesamning í höndunum" og það á eftir að koma í ljós hvernig þingmenn taka þessum nýja samningi.

Síðan segir að ef málið klárast á næstunni er líklegt að skuldatryggingaálagið lækki verulega og jafnframt að fjármögnun innlendra aðila á erlendum mörkuðum verði auðveldari.

Þetta álit í Markaðsfréttum stemmir við orð Streingríms J. Sigfússonar fjármálaráðherra í fréttum á Bylgjunni í gærdag um að vel gangi í samningaviðræðunum við Breta og Hollendinga um Icesaveskuldina. Ráðherrann segir að von sé til að niðurstaða liggi fyrir á næstunni.