Kröfuhafar Kaupþings uggandi yfir aðgerðunum

Kröfuhafar Kaupþings eru uggandi yfir stjórnmálaástandi og vegna aðgerða til handa skuldsettum heimilum en þeir eiga meirihluta í Arion banka.

Slitastjórn Kaupþings fundaði með kröfuhöfum í morgun. Ólafur Garðarsson, formaður slitastjórnar, segir að kröfuhafar hafi miklar áhyggjur af því sem sé að gerast í stjórmálum landsins. Þeir fylgist vel með stöðu mála varðandi lausnir á skuldavanda heimilanna og öðru.

„Þegar menn standa frammi fyrir því að kannski á að fara fram almenn niðurfelling þá auðvitað hafa menn áhyggjur, við vonum nú að þau mál séu að leysast á farsælan hátt," segir Ólafur. Hann segir að samstarfið við kröfuhafa gangi ágætlega þrátt fyrir ýmsar deilur.

„Auðvitað hafa menn skoðanir, þeir eru ánægðir með sumt og misánægðir með annað".

En eru kröfuhafar að hóta málsókn vegna aðgerða í þágu skuldsettra heimila, sem hafa verið í undirbúningi síðustu vikur?

„Ég veit ekki nákvæmlega hvað hefur farið á milli þeirra og stjórnvalda en þeir hafa látið vita af því að þeir séu ekki sáttir við þetta og muni sækja bætur ef það verður gengið á þeirra hlut"