Tinna jafnaði vallarmetið en Ólafía heldur forustunni

Tinna Jóhannsdóttir úr Keili lék best á þriðja deginum á Íslandsmótinu í höggleik á Kiðjabergsvelli. Tinna lék þriðja hringinn á pari í dag, jafnaði vallarmetið og vann upp fimm högg á Ólafíu Þórunnar Kristinsdóttur úr GR. Ólafía hélt samt eins höggs forskoti fyrir lokadaginn en Ólafía hefur verið efst allt mótið.

Tinna lék frábærlega í dag (2 undir eftir 16 holur) og var komin í efsta sætið undir lok dagsins. Tinna tapaði hinsvegar tveimur höggum á 17. holu og á sama tíma fékk Ólafía tvo fugla á síðustu þremur holunum og náði því aftur að komast í efsta sætið.

Tinna lék á 71 höggi í dag og jafnaði þar með vallarmetið sem Valdís Þóra Jónsdóttir setti í Pro-Am mótinu síðastliðinn mánudag.

Signý Arnórsdóttir, félagi Tinnu úr Keili, spilaði einnig vel í dag eða á tveimur höggum yfir pari. Signý er í þriðja sæti þremur höggum á eftir Ólafíu. Nína Björk Geirsdóttir á einnig góða möguleika fyrir lokadaginn en hún er í fórða sæti höggi á eftir Signýju.



Staða efstu kvenna á Íslandsmótinu í höggleik fyrir lokadaginn:

1. Ólafía Þórunn Kristinsdóttir, GR +15

2. Tinna Jóhannsdóttir, GK +16

3. Signý Arnórsdóttir, GK +18

4. Nína Björk Geirsdóttir, GKj +20

5. Valdís Þóra Jónsdóttir, GL +23

6. Þórdís Geirsdóttir, GK +24

7. Berglind Björnsdóttir, GR +25

8. Hildur Kristín Þorvarðardóttir, GR +29

9. Helena Árnadóttir, GR +34

10.Eygló Myrra Óskarsdóttir, GO +35

10. Karlotta Einarsdóttir, Nes +35