Ekki átti að rýra réttindin

Höfuðstólslækkun bílalána sem boðið var upp á hjá Íslandsbanka í byrjun árs gekk til baka í nokkrum tilvikum við endurútreikning lána eftir dóm Hæstaréttar í sumar. Búið er að birta endurútreikning í heimabanka fimm til sex þúsund viðskiptavina Íslandsbanka. Nokkrir viðskiptavina bankans hafa kvartað vegna málsins.

Fréttablaðið hefur undir höndum afrit af bílalánasamningi viðskiptavinar bankans. Hann tók lán til fjögurra ára árið 2006. Helmingur þess var í krónum en afgangurinn í blandaðri mynt. Lántaki samdi í febrúar um höfuðstólslækkun, sem nam 35 þúsund krónum, eða tólf prósentum. Lækkunin gekk til baka við endurútreikning í haust.

Íslandsbanki segir þetta hafa gerst í undantekningartilvikum. Það hafi komið fyrir nokkra sem voru með stuttan lánstíma, höfðu borgað lán sín niður á hágengistíma og stutt í síðasta gjalddaga. Þá hafði áhrif ef viðkomandi nýtti sér greiðsluúrræði. Gísli Tryggvason, talsmaður neytenda, segir úrræðin ekki hafa átt að rýra rétt neytenda. Þvert á móti áttu þeir að njóta betri réttar.

Verið er að skoða innan Íslandsbanka hvernig tilfelli sem þessi verða meðhöndluð, samkvæmt svari frá bankanum. - jab