Guðbjörg Edda Eggertsdóttir ráðin forstjóri Actavis

Guðbjörg Edda Eggertsdóttir verður forstjóri Actavis á Íslandi í kjölfar skipulagsbreytinga hjá félaginu, sem þegar hafa tekið gildi. Hún situr sem fyrr í framkvæmdastjórn Actavis Group og mun jafnframt stýra margvíslegum verkefnum á heimsvísu, m.a. í Japan, Kína, á Indlandi og víðar.

Fjallað er um málið á vefsíðu Actvis. Þar segir að Guðbjörg Edda hafi starfað hjá fyrirtækinu og forverum þess í 30 ár. Hún var aðstoðarforstjóri Delta frá 1999, framkvæmdastjóri á markaðssviði Actavis Group frá 2002 og aðstoðarforstjóri samstæðunnar frá 2008. Guðbjörg Edda er lyfjafræðingur að mennt.

„Actavis er og verður íslenskt fyrirtæki og það er mikilvægt bæði fyrir mig sem forstjóra og fyrir fyrirtækið að hafa Eddu í þessari stöðu," segir Claudio Albrecht, forstjóri Actavis Group.

„Ég ferðast mikið vegna starfsins svo ég vildi tryggja að þessi mikilvæga staða væri vel skipuð. Edda er öllum hnútum kunnug, hefur langa reynslu, mikla þekkingu á faginu og hefur áunnið sér virðingu bæði innan fyrirtækisins og utan þess."