Viðskipti innlent

Fékk risalán til að kaupa Fons út úr Iceland

Þorbjörn Þórðarson skrifar

Landsbankinn lánaði félagi í eigu Stoða og annarra, rúmlega fimmtíu milljarða til að kaupa Fons, félag Pálma Haraldssonar, út úr Iceland verslanakeðjunni rétt fyrir hrun. Skuldin stendur nú í níutíu milljörðum og þarf skilanefnd bankans væntanlega að taka yfir hlutinn áður en árið er úti. Þessi eign er hluti þess sem á að ganga upp í Icesave.

Fyrirtækið Stytta er í eigu tveggja félaga annars vegar Stoða, áður FL Group, og hins vegar fyrirtækisins Blackstar Limited sem skráð er á eynni Mön. Blackstar er í eigu þriggja lykilstjórnenda bresku verslanakeðjunnar Iceland, þeirra Malcolms Walkers, forstjóra, Andrew Pritchards og Tarsems Singh Dhaliwals, fjármálastjóra Iceland.

Stytta fékk 430 milljóna punda lán hjá árið 2008 til að kaupa 29 prósenta hlut Fons, eignarhaldsfélags Pálma Haraldssonar, í Iceland-keðjunni. Langstærstur hluti fjárhæðarinnar var fenginn að láni hjá Landsbanka Íslands, samkvæmt heimildum fréttastofu, en umreiknað í íslenskar krónur stendur lánið í 86 milljörðum króna. Til að setja þá upphæð í samhengi má geta þess að upphafleg kostnaðaráætlun vegna byggingar Kárahnjúkavirkjunar var hundrað milljarðar króna en upphæðin er um fjórðungur þess sem hugsanlega lendir á íslenskum skattgreiðendum vegna Icesave.

Eins og áður segir var langstærstur hluti fjárhæðarinnar fenginn að láni hjá Landsbanka Íslands. Taka ber þó skýrt fram að stór hluti upphæðarinnar var að öllum líkindum yfirtaka á láni Landsbankans til Fons. Í september á þessu ári þarf Stytta að greiða afborgun af láninu upp á tæplega 70 milljarða króna, en eina eign félagsins er 29 prósenta hlutur í Iceland.

Ekki liggur fyrir nýlegt opinbert verðmat á Iceland keðjunni. Baugur var stærsti hluthafinn með hlut sem nú er í eigu Landsbankans, eftir gjaldþrot Baugs. Í Project Sunrise, sérstakri áætlun um endurreisn Baugs, sem aldrei varð að veruleika, var Iceland-keðjan verðlögð á rúman milljarð punda, eða um 200 milljarða króna. Þetta verðmat þykir þó umdeilt og í því samhengi má benda á að breska dagblaðið The Sunday Times verðlagði fyrirtækið á 400 milljónir punda á vormánuðum 2008.

Landsbankinn heldur nú utan um 40 prósenta hlut í Iceland. Gríðarlegar lagalegar flækjur eru því samfara að taka Styttu yfir, samkvæmt heimildum fréttastofu. Ef það gengur hins vegar eftir mun Landsbankinn eiga 69 prósenta hlut í Iceland og verða langstærsti hluthafinn, en í undirbúningi er yfirtaka á Styttu innan skilanefndar Landsbankans, samkvæmt heimildum fréttastofu.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
SVN
5,48
74
454.902
BRIM
5,04
39
407.145
KVIKA
2,46
55
1.227.110
ARION
2,04
77
2.874.320
SJOVA
1,06
43
336.282

Mesta lækkun dagsins


Félag
Br.%
Fjöldi
Velta*
ICESEA
-2,34
9
80.005
MAREL
-1,75
36
579.123
HAGA
-1,52
13
276.948
EIK
-0,87
2
45.600
ORIGO
-0,8
4
18.924
Velkomin á Vísi. Þessi vefur notar vafrakökur. Sjá nánar.