Nick hefur tapað öllum leikjunum á móti Keflavík

Njarðvíkingar eiga á hættu að vera sópað í sumarfrí af nágrönnum sínum í Toyota-höllinni í kvöld og þeir þurfa því nauðsynlega á stórleik að halda frá Bandaríkjamanninum sínum Nick Bradford. Nick á hinsvegar enn eftir að kynnast því að vinna Keflavík í Njarðvíkurbúningnum.

Nick varð í vetur fyrsti bandaríski leikmaðurinn til að spila með bæði Keflavík og Njarðvík en það hefur ekkert gengið hjá honum né félögum hans í Njarðvíkurliðinu á móti nágrönnunum. Nick hefur nú spilað fjóra leiki með Njarðvík á móti Keflavík og þeir hafa allir tapast með 11 stigum eða meira.

Bradford varð Íslandsmeistari bæði árin sem hann spilaði með Keflavík 2003-2004 og 2004-2005. Hann fór þá á kostum með liðinu í úrslitakeppninni alveg eins og með Grindavík þegar hann var aðeins einu skoti frá því að vinna titilinn í þriðja skiptið.

Leikurinn á fimmtudagskvöldið var fyrsti heimaleikur Nick með Njarðvík á móti Keflavík en útkoman var enn verri en í fyrri skiptin - langstærsta heimatap Njarðvíkur á móti Keflavík í sögu úrslitakeppninnar.

Nick er með 17,3 stig og 8,0 fráköst að meðaltali í þessum fjórum leikjum á móti Keflavík en hann er með fleiri tapaða bolta (24) en skoraðar körfur (23) og það lítur oft út fyrir að Keflvíkingarnir þekki einstaklega vel alla hans kosti og galla.

Það er þó ekki bara Nick sem kemst lítið áleiðis gegn Keflavíkurliðinu því Keflvíkingar hafa hreinlega tekið stigahæsta leikmann Njarðvíkinga, Jóhann Árna Ólafsson, úr sambandi í þessum fjórum leikjum liðanna á árinu 2010.

Jóhann Árni er aðeins með 8,8 stig, 0,8 stoðsendingar og 19 prósent skotnýtingu í síðustu fjórum leikjum á móti Keflavík og Njarðvíkurliðið hefur tapað með 70 stigum þá 101 mínútu sem hann hefur spilað.

Þriðji leikur Keflavíkur og Njarðvíkur í undanúrslitum Iceland Express deildar karla hefst klukkan 19.15 í Toyota-höllinni í Keflavík.