Álverið í Straumsvík fær öryggisviðurkenningu afhenta

Álverið í Straumsvík hlaut öryggisviðurkenningu aðalforstjóra Rio Tinto fyrr á árinu og fór verðlaunaafhending fram í dag við hátíðlega athöfn.

Viðurkenningin er veitt fyrir framúrskarandi árangur í öryggismálum á undanliðnum tveimur árum. Tom Albanese, aðalforstjóri Rio Tinto, afhenti viðurkenninguna og var athöfnin vel sótt af starfsfólki ISAL að því er fram kemur í tilkynningu frá fyrirtækinu.

„Í ávarpi sínu fjallaði hann meðal annars um að þessi verðlaun væru þau mikilvægustu sem veitt væru innan samstæðunnar fyrir öryggismál. Rio Tinto er í hópi stærstu fyrirtækja í heimi og því er það mikill heiður fyrir starfsfólk álversins í Straumsvík að hljóta útnefningu innan svo stórrar samstæðu," segir ennfremur og sagt að viðurkenningin sé til marks um „ríkan metnað allra sem starfa fyrir álverið til að ná framúrskarandi árangri, ekki aðeins varðandi öryggismál heldur alla þætti rekstrarins."