Birgir Leifur Íslandsmeistari í golfi í fjórða skipti

Birgir Leifur Hafþórsson úr Golfklúbbi Kópavogs og Garðabæjar er Íslandsmeistari karla í golfi árið 2010 en hann átti frábæran lokadag á Íslandsmótinu í höggleik á Kiðjabergsvellinum. Þetta er í fjórða sinn sem Birgir Leifur verður Íslandsmeistari en hann vann einnig Íslandsmeistaratitilinn 1996, 2003 og 2004.

Birgir Leifur vann Íslandsmótið með þriggja högga mun en hann lék holurnar 18 í dag á einu höggi undir pari og endaði mótið því á parinu.

Birgir Leifur er nýkominn af stað eftir erfið meiðsli og stimplaði sig heldur betur inn í Kiðjaberginu með frábærri spilamennsku. Hann gaf aðeins eftir á seinni níu holunum á þriðja hring en bætti heldur betur fyrir það á sömu níu holunum í dag.

Sigmundur Einar Másson var með eins höggs forkost fyrir lokadaginn og byrjaði lokahringinn á því að fá tvo fugla á fyrstu sex holunum. Sigmundur náði þó ekki að fylgja því eftir og á 11. til 13. holur skildu leiðir hjá honum og Birgi Leif. Sigmundur tapaði þá þremur höggum á sama tíma og Birgir Leifur fékk tvo fugla.

Birgir Leifur stakk andstæðinga sína hreinlega af á þessum kafla og náði mest sex högga forskoti. Eftir það var spennan mest í kringum það hver yrði í öðru sætinu.

Kristján Þór Einarsson úr Kili lék mjög vel í dag og tryggði sér annað sætið með því að spila lokahringinn á tveimur höggum undir pari. Sigmundur Einar varð í þriðja sæti tveimur höggum á eftir Kristjáni.

Lokastaða efstu karla á Íslandsmótinu í höggleik 2010:

1. Birgir Leifur Hafþórsson, GKG Par

2. Kristján Þór Einarsson, GKj +3

3. Sigmundur Einar Másson, GKG +5

4. Þórður Rafn Gissurarson, GR +6

5. Hlynur Geir Hjartarson, GK +8

6. Heiðar Davíð Bragason, GHD +9

7. Stefán Már Stefánsson, GR +10

8. Alfreð Brynjar Kristinsson, GR +11

9. Örvar Samúelsson, GA +13

9. Guðmundur Ágúst Kristjánsson, GR +13

9. Axel Bóasson, GK+13

9. Guðjón Henning Hilmarsson, GKG +13

13. Arnór Ingi Finnbjörnsson, GR +14

14. Haraldur Franklín Magnús, GR +15

15. Birgir Guðjónsson, GR +17

15. Helgi Birkir Þórisson, GSE +17