Ísland var í 16. sæti yfir aflahæstu fiskveiðiþjóðirnar

Ísland var í 16. sæti listans yfir aflahæstu fiskveiðiþjóðir heims árið 2006 með heildarafla upp á 1,35 milljónir tonna.

Fjallað er um málið á vefsíðu LÍÚ. Þar segir að Kínverjar bera ægishjálm yfir aðrar fiskveiðiþjóðir hvað aflamagn varðar. Heildarafli þeirra árið 2006 var 17,4 milljónir tonna. Næstir á eftir þeim koma Perúmenn með 7 milljónir tonna.

Alls veiddu 32 ríki heims 500.000 tonn af fiski eða meira árið 2006. Heildarafli ársins var rétt um 92 milljónir tonna. Hlutdeild þessara 32 ríkja í alheimsaflanum var rúmlega 86%.

Af 92 milljóna tonna heildarafla heimsins kom 50,1 milljón tonna úr Kyrrahafinu eða 54,5%. Atlantshafið gaf 19,9 milljónir tonna eða 21,6% heimsaflans. Afli úr innhöfum og vötnum nam 10,1 milljón tonna.