Kaupþing rekið eins og spilavíti

Kaupþing var rekið eins og spilavíti að mati lektors við Háskóla Íslands. Þrír af stærstu eigendum bankans og félög tengd þeim fengu hátt í fimm hundruð milljarða króna í lán frá bankanum eða því sem nam rúmlega einum tíunda af útlánum til viðskiptavina.

Morgunblaðið birti í dag upplýsingar úr lánabók Kaupþings frá 30. Júní í fyrra. Þar kemur fram að Kaupþing lánaði stærstu eigendum sínum og tengdum aðilum 478 milljarða. Lýður og Ágúst Guðmundssynir, stærstu eigendur Exista sem var stærsti hluthafi Kaupþings fyrir bankahrun, fengu rúma 169 milljarða að láni frá bankanum. Ólafur Ólafsson, kenndur við Samskip og einn stærsti eigandi Eglu sem átti tæp 10% í Kaupþingi, fékk tæpa 79 milljarða að láni. Þá námu lán til Roberts Tchenguiz rúmum 230 milljörðum. Vilhjálmur Bjarnason, lektor við HÍ, segir þessar upphæðir gríðarlega háar og beri að setja þær í samhengi. Hann bendir til dæmis á að eigið fé bankanna um mitt ár hafi verið 430 milljarðar. þessir þrír aðilar hafi því verið með rúmlega eigið fé bankans.

Sé litið á efnahagsreikning bankans frá öðrum ársfjórðungi síðasta árs eða frá sama tíma og upplýsingarnar eru má sjá að útlán til þriggja stærstu eigenda bankans námu 11% af útlánum bankans til viðskiptavina. Lánabók bankans ber þó ekki saman við milliuppgjörið þar sem fram kemur að lán til tengdra aðila hafi verið 146 milljarðar en ekki 478.

Vilhjálmur segir að sé tekið tillit til að þessa, auk þess að stjórnendur skulduðu rúma 50 milljarða vegna hlutabréfakaupa og fjárfestinga bankans í skuldabréfum sem fréttastofa hefur greint frá megi segja að bankinn hafi verið rekinn eins og spilavítí.

Ekki náðist í Ólaf Ólafsson, Lýð og Ágúst Guðmundssyni þrátt fyrir ítrekaðar tilraunir.