Sigurjón skráði húsið á nafn eiginkonunnar

Sigurjón Árnason fyrrverandi bankastjóri Landsbankans var sá eini af bankastjórum þeirra þriggja banka sem hrundu í október sem brá á það ráð að skrá íbúðarhúsnæði sitt á nafn maka síns þegar að bankarnir hrundu.

Eins og fréttastofa RÚV greindi frá í gærkvöld afsöluðu nokkrir fyrrverandi yfirmenn hjá Kaupþingi húseignum sínum til maka sinna rétt áður en bankinn fór í þrot. Afsöl af þessu tagi geta komið í veg fyrir að fólk missi húseignir sínar fari fólk í greiðsluþrot eða gjaldþrot. Sigurjón afsalaði íbúð sinni að Granaskjóli í Reykjavík til eiginkonu sinnar þann 15. október en bankinn hrundi þann 7. október. Afsölum á milli nákominna er hægt að rifta ef þeir flokkast undir málamyndagerninga. Þá eru afsöl líka riftanleg ef sýnt þykir að einstaklingur hefur ekki átt fyrir skuldum sínum þegar afsölin voru gerð.

Fréttastofa reyndi að ná tali af Sigurjóni við vinnslu þessarar fréttar en ekki náðist í hann.